"Acadamos que o 50% dos anuncios sexan en galego"
O director xeral da Compañía da Radio e Televisión de Galicia (CRTVG), Benigno Sánchez, considera que ten nas mans un potente aparato para divulgar e normalizar a utilización do galego nos negocios. "Cando chegamos a novo equipo, o 59% dos anuncios de empresas privadas na TVG eran en castelán. Estamos a darlle a volta a situación e xa conseguimos que agora o 50% da publicidade sexa en galego", explica o responable da televisión pública galega. "Estou convencido, e así nolo din os nosos estudios de mercado, que o galego non é un obstáculo para que os negocios anden polo mundo porque é un xeito de singularizar, situar e darlle valor engadido a un producto", opina Sánchez.
A TVG ten en marcha unha campaña con incentivos e descontos comerciais para que as empresas divulguen a súa publicidade en galego. "Está funcionando moi ben e o noso obxectivo é chegar a un 100% de anuncios en galego". Benigno Sánchez subliña que, ademáis, "ver falar na tele en galego a importantes homes de negocios e persoeiros da economía é algo que normaliza, divulga e quita moitos medos ao emprego da lingua galega no mundo da empresa".
